É inconcebible que continúe pechado ao público por máis tempo e por iso demandamos actuacións urxentes, por unha banda, reparar o innegable desgaste do edificio, que pode provocar deterioro tamén do importante volume de obra que acumula, ao levar pechado desde o ano 2016.

Pola outra, que a Xunta de Galiza actúe de inmediato para protexer este legado en severo risco, dando cumprimento ao acordo parlamentario de resolver o expediente BIC, pendente desde o ano 2010.

No 2018 nun informe do propio Consello da Cultura Galega, órgano consultivo de referencia da Xunta de Galiza, afirmábase que “a colección e edificio merecen a protección necesaria para garantir a súa permanencia e preservación indisociablemente unidos”. Un informe que conclúe manifestando que “tanto o edificio do Museo Carlos Maside como a Colección documental e pictórica que alberga merecen, pola súa natureza e carácter, a protección BIC”.

Para o BNG é inadmisible que a día de hoxe ainda non exista ninguna resolución firme e todo se quede en publicidade engañosa sobre a chegada dunha boa nova que nunca acaba de producirse.

O Museo Carlos Maside recolle desde a súa apertura no ano 1970 obras de autores de vangarda, moitos deles exiliados por mor da guerra civil do 36 . Obras de Castelao, Asorey, Lugris Freire, Luis Seoane, Maruxa Mallo, Laxeiro, Francisco Llorens e moitos outros, así como un edificio en mal estado de conservación, que están á espera desa decisión da Xunta que permitiría salvagardar o edicicio e tamén a correcta conservación das obras que contén.

A Deputada nacionalista Mercedes Queixas xa presentou iniciativas ao respecto e volverá a presentar no Parlamento Galego outras, coma a que hoxe se anuncia, para que o goberno da Xunta responda e poña prazos para que dunha vez por todas chegue esa protección a este museo que se ubica no noso concello de Sada.

• - Petición de visita ao museo Carlos Maside (pdf)